Восень — прыгожая пара, якая дорыць светлы настрой, апошняе цяпло, прыемны водар астраў і вяргінь. Аднак асенняя пара — гэта яшчэ і час падсумавання, падвядзення вынікаў, збору ўраджаю.
Рэспубліканская акцыя “Сад надзеі” ахоплівае адукацыйныя ўстановы па ўсёй краіне. Дзякуючы акцыі, дзеці і моладзь вучацца быць руплівымі, гаспадарлівымі і адказнымі. Гэтай восенню зноў закіпела работа. Амаль у кожнай школе маецца свой сад і невялікі агарод, якія патрабуюць догляду і пільнага вока.
У Цудзенішскай сярэдняй школе вучні разам са сваімі педагогамі актыўна ўключыліся ў працу. Цэлыя мяхі чырванабокіх яблыкаў назбіраны маленькімі рупліўцамі. Настаўнікі адзначаюць, што школьнікі вельмі чакалі моманту, калі змогуць разам папрацаваць. Смех, жарты, жывыя зносіны – усё гэта дае сумесная праца, яна збліжае і аб’ядноўвае.
Выхаванцы Барунскай сярэдняй школы працуюць не толькі ў школьным садзе і агародзе, але яшчэ аказваюць дапамогу эксперыментальнай базе “Баруны”. Такі вопыт з’яўляецца вельмі важным і каштоўным для дзяцей, бо вучыць адказнасці за якасць сваёй працы.
А ў Гальшанскай сярэдняй школе паспяхова дзейнічае ўласная бізнес-кампанія, якая патрабуе пастаянных высілкаў і пільнага вока. Работа там кіпіць заўжды. Пасеў, пікіроўка, паліў, праполка, збор ураджаю – гэта толькі невялікае кола абавязкаў юных бізнесоўцаў. Ад якасці працы залежыць вынік. Гэта разумее кожны. Таму вучні імкнуцца як мага лепш выконваць свае абавязкі. Каля школы пасаджаны кусты і маладыя дрэўцы, таму тэрыторыя таксама не можа заставацца па-за ўвагай. Выхаванцы дапамагаюць збіраць ураджай, захоўваць чысціню і парадак на клумбах. Тэрыторыя каля школы дастаткова вялікая, аднак ніколі не бывае занядбанай.
Уключаюцца ў працу і гарадскія ўстановы адукацыі. Хтосьці працуе на прышкольнай тэрыторыі, прыводзячы яе ў належны стан, а хтосьці дапамагае гаспадаркам. Працоўнае выхаванне адыгрывае вялікую ролю ў агульным развіцці асобы, яно рыхтуе да самастойнага жыцця, фарміруе гаспадарлівасць і адказнасць. Рэспубліканская акцыя “Сад надзеі” дае штуршок кожнаму для развіцця працоўных навыкаў.
Марта БАГДАНОВІЧ.
