Удзел устаноў адукацыі Ашмянскага раёна ў эксперыментальным праекце па апрабацыі мадэлі рэспубліканскай алімпіяды дазволіў вучням удзельнічаць у алімпіядах па некалькіх прадметах на ўсіх этапах, што значна павялічыла колькасць дзяцей, якія вырашылі праверыць свае сілы ў раённых іспытах. Калі ў 2009 годзе на раённым узроўні выступіла 344 вучні, то ў 2010 іх было ўжо 509.
На абласныя алімпіяды змаглі паехаць тыя вучні з ліку пераможцаў, якія выканалі больш 50 працэнтаў заданняў і прайшлі рэйтынгавы адбор разам з “алімпійцамі” другіх раёнаў вобласці.
У выніку ў зборную Ашмянскага раёна ўвайшло 27 вучняў. У мінулым годзе іх было на чатыры менш. Міхаіл Чарнушэвіч (СШ №1), Вераніка Данішэўская (СШ №3) і Арцём Лугін (Гальшанская гімназія) ў абласных алімпіядах выступілі па двух прадметах. Усе яны сталі прызёрамі, а Вераніка Данішэўская прынесла сваёй школе два прызавыя месцы: дыпломы трэцяй ступені па гісторыі (настаўніца В.І. Шаверда) і грамадазнаўству (Я.І. Жвірыдоўская).
Адзінаццаць узнагарод – з такім рэзультатам вярнуліся з абласных алімпіяд нашы вучні. Прыемна зазначыць, што кожны год узровень падрыхтаванасці і трываласці ведаў нашых дзяцей павышаецца, што не можа не радаваць і настаўнікаў, і вучняў, і іх бацькоў. Для параўнання, у мінулым навучальным годзе ў нашым раёне было 8 прызавых месцаў.
Абсалютным пераможцам на абласной алімпіядзе па англійскай мове стаў вучань гімназіі №1 Аляксей Завадскі (настаўніца Л.А. Кусанава). Адзінаццацікласнік Аляксей справіўся з прапанаванымі заданнямі амаль на сто працэнтаў. Вучаніца гімназіі Ксенія Пракопчык узнагароджана дыпломам трэцяй ступені па рускай мове (настаўніца А.М. Савёнак).
Чатыры прызавыя месцы занялі вучні СШ №3: Аліна Камарова ўзнагароджана дыпломам другой ступені па астраноміі ( Г.І. Чубрык), Алёна Буткевіч – таксама дыпломам другой ступені, толькі па біялогіі (А.А. Кумпіцкая) і два дыпломы ў Веранікі Данішэўскай, аб якой мы расказвалі вышэй.
Вучні СШ №1 занялі два другія месцы: Алена Гаштольд па абслугоўваючай працы (Ж..В. Ляшчэвіч) і Міхаіл Чарнушэвіч па геаграфіі (Л.І. Станкевіч) і адно трэцяе – вучань У.М. Калядкі Дзмітрый Трухан атрымаў дыплом трэцяй ступені па тэхнічнай працы. Гальшанская гімназія, дарэчы, па добрай традыцыі, якая трывала замацавалася ва ўстанове, прынесла раёну два другія месцы. У каторы раз Арцём Лугін разам са сваёй мамай, настаўніцай Г.К. Лугінай дабіваецца высокіх вынікаў па хіміі. Штогод у ліку прызёраў і вучні Н.М. Эйдзюкевіч: дыпломам за трэцяе месца па роднай мове ўзнагароджана адзінаццацікласніца Алёна Пальчэўская.
Зараз пераможцы і прызёры абласных алімпіяд накіроўваюцца на вучэбна-трэніровачныя зборы па падрыхтоўцы да іспытаў рэспубліканскіх , якія запланаваны на красавік.
Аліна САНЮК.
Фото: csu.ru