Творчы фестываль-конкурс “Адна зямля”, які аб’ядноўвае таленавітую моладзь трох раёнаў Гродзеншчыны і чатырох — Міншчыны, завітаў у гэтым годзе на ашмянскую зямлю. Прыйшоў ён са Смаргоні, каб у Дзень моладзі, што само сабой зразумела, падарыць ашмянцам зарад бадзёрасці і аптымізму.
Моладзь і песня – паняцці непадзельныя, заўважаюць вядучыя фестывалю Аксана Юркантовіч і Сяргей Жылік, адкрываючы свята. На расквечаную рознакаляровымі паветранымі шарамі і ўпрыгожаную сямю гербамі гарадоў-райцэнтраў сцэну яны запрашаюць удзельнікаў фестывалю-конкурсу. Маладых таленавітых артыстаў з Маладзечанскага, Мядзельскага, Вілейскага, Валожынскага, Смаргонскага, Астравецкага і Ашмянскага раёнаў гледачы сустракаюць бурнымі апладысментамі.
Гасцей і ўдзельнікаў урачыстасці вітаюць старшыня аргкамітэта фестывалю, намеснік старшыні раённага выканаўчага камітэта Аляксандр Саванец і дэпутат Палаты прадстаўнікоў Нацыянальнага сходу Рэспублікі Беларусь Валянціна Лузіна. Мерапрыемства праходзіць у знамянальны для нашай рэспублікі год – 65-годдзе з Дня Перамогі нашага народа ў Вялікай Айчыннай вайне, таму прадстаўнікі раёнаў ускладаюць кветкі да помніка загінуўшым воінам у парку ў знак даніны павагі да тых салдат, якія не вярнуліся з поля бою. Затым вядучыя называюць журы, ад аб’ектыўнай ацэнкі якога і будзе залежаць вынік творчага спаборніцтва прадстаўнікоў сямі раёнаў рэспублікі. Галіна Качалава – заслужаны работнік культуры Рэспублікі Беларусь, Таццяна Грыгаран – намеснік дырэктара Гродзенскага абласнога метадычнага цэнтра народнай творчасці, Дзмітрый Сушко – вядучы метадыст па музычным мастацтве Мінскага абласнога метадычнага цэнтра народнай творчасці, Алег Пухаў – артыст-вакаліст Гродзенскай абласной філармоніі, Алег Сівы – галоўны дырыжор Мінскага абласнога метадычнага цэнтра народнай творчасці на працягу цэлага дня займаліся нялёгкай справай, бо канкурсанты прадэманстравалі не толькі высокі ўзровень выканальніцкага майстэрства, але і ўменне падаць сябе і музычны твор, які яны выконвалі.
Амаль усе ўдзельнікі конкурсу займаюцца альбо закончылі музычныя школы і вучылішчы, пасцігаюць музычную грамату ў вышэйшых навучальных установах. Многія з’яўляюцца прызёрамі і пераможцамі шэрага абласных і рэспубліканскіх творчых конкурсаў, радуюць гледачоў на раённых святах і мерапрыемствах іншага кшталту. Самыя юныя канкурсанты яшчэ робяць першыя крокі на такой прадстаўнічай сцэне, аднак гэта не дае падстаў сумнявацца ў іх творчых здольнасцях. Пасля першай песні яны адразу ж палюбіліся ашмянцам, якія з радасцю чакалі другога выхаду маладых артыстаў.
Так як удзельнікі конкурсу выступалі ў чатырох узроставых катэгорыях і па ўмовах фестывалю выконвалі дзве рознажанравыя песні, для таго каб даць адпачынак журы, на сцэну выходзілі мясцовыя артысты: народны тэатр танца і песні “Імпульс” раённага Дома культуры, узорная эстрадная студыя “Палёт” СШ №1, вучні СШ №3, навучэнцы аграрна-эканамічнага каледжа, рок-гурт гэтай навучальнай установы пад назвай “Намінальны аб’ём”. І хаця фестываль зацягнуўся, ашмянцы дамоў не спяшаліся. Усе чакалі вынікаў і вельмі хваляваліся за нашых канкурсантаў: Святлану Муцянскую ( вучаніцу СШ №1), Кацярыну Чаплінскую ( СШ №3), Алу Яновіч (Гальшанская гімназія), Марыю Лайкоўскую ( навучэнку аграрна-эканамічнага каледжа), Алесю Жынь ( студэнтку Мінскі інстытут кіравання і прадпрымальніцтва), Дзіну Красевіч (мастацкага кіраўніка Кальчунскага Дома культуры), Васіля Каспяровіча (саліста народнага ансамбля цыганскай песні “Джана рома”), Аляксандра Жукоўскага (выкладчыка Ашмянскай дзіцячай школы мастацтваў).
І вось пасля перапынку журы, арганізатары фестывалю, прадстаўнікі аддзелаў культуры сямі раёнаў паднімаюцца на сцэну. Ад судзейскага корпусу з віншаваннем выступіла старшыня журы Галіна Качалава, якая падзякавала ўсім канкурсантам за падораныя хвіліны сапраўднай творчасці і гледачам – за цярпенне і падтрымку маладых талентаў. Затым наступіў самы хвалюючы момант фестывалю-конкурсу. Вядучыя абвясцілі вынікі па кожнай намінацыі. Ва ўзроставай катэгорыі 9-13 год трэцяе месца заняла Вольга Касцюкевіч са Смаргонскага раёна, другое месца – Лідзія Сасункевіч з Маладзечанскага, першае месца – Вікторыя Місюль з Вілейскага, якая пакарыла журы і гледачоў песняй у стылі джаз “Хлопчык-хуліганчык”. У катэгорыі ад 14 да 17 год месцы размеркаваліся наступным чынам: трэцяе – у нашай Марыі Лайкоўскай, другое – у Кацярыны Барташэвіч з Вілейкі, перамога дасталася Эдуарду Жалубоўскаму з Маладзечна. Ва ўзросце ад 18 да 23 год трэцяй была Таццяна Макарэвіч з Вілейскага раёна, другой – Алеся Далгіх з Мядзельскага, першым – Дзмітрый Мазурцоў з Валожына. Усе чакалі абвяшчэння рэзультатаў у апошняй групе 24-30 год, дзе выступалі нашы Васіль і Аляксандр, якія прэтэндавалі на прызавыя месцы. Васілю Каспяровічу дасталося другое месца, трэцяе павезла ў Смаргонь ваеннаслужачая органаў пагранічнай службы Надзея Страшынская, першае месца ў гэтай катэгорыі журы прысудзіла Паўлу Смоліку з Маладзечна, які выконваў, дарэчы, адну і тую ж песню з Васілём Каспяровічам – “Княжна” з рэпертуару ансамбля “Песняры”. Аляксандру Жукоўскаму прыз ад “Рэгіянальнай газеты” ўручыла намеснік рэдактара гэтага выдання Марына Сліж. Прыз “Творчыя надзеі” атрымала ад начальніка аддзела па справах моладзі Ашмянскага райвыканкама Дзяніса Седача наша вакалістка Алеся Жынь. Рэдактар раённай газеты Аашмянскі веснік” Ганна Давідовіч прыз глядацкіх сімпатый аддала нашаму суседу – астраўчаніну Паўлу Букелю. Гран-пры рэгіянальнага фестывалю атрымала студэнтка Дзяржаўнага універсітэта культуры і мастацтваў Вольга Ільіч з Маладзечна. Разам з дыпломам ёй быў уручаны тэлевізар. Падарункі, дыпломы і кветкі атрымалі ўсе прызёры конкурсу.
Фінальным акордам урачыстасці стала выступленне начальніка аддзела культуры Галіны Балінскай, якая падзякавала усім, хто прыняў удзел у падрыхтоўцы і правядзенні свята, уручыла сувеніры членам журы і перадала эстафету рэгіянальнага фестывалю- конкурсу калегам з Астраўца, дзе на наступны год пройдзе трынаццаты па ліку фэст-вандроўца.
Аліна Санюк.
Васек! зажигай!!