Гаспадаркі Ашмянскага раёна прыступілі да ўборкі кукурузы. Пад гэту культуру, якую з гонарам называюць царыцай палёў, на Ашмяншчыне адведзена сёлета 5900 га пасяўных плошчаў. Нарыхтоўка кукурузы на сілас найбольш актыўна вядзецца ў КСУП “Прыгранічны”, “Крэйванцы” і СУП “АграМалРай”. Сярэдняя ўраджайнасць па раёне складае 350 цэнтнераў з гектара. Крэйванцаўскія аграрыі гэту лічбу пераўзышлі – на сваіх палетках збіраюць па 383 цэнтнеры на круг. Такі рэзультат упэўнівае ў тым, што гэтага высокабялковага ўраджаю хопіць з лішкам для паўнавартаснага кармлення буйной рагатай жывёлы на працягу года.
Каб даведацца сакрэт такой ураджайнасці, мы накіраваліся ў Крэйванцы. Шчыра прызнаюся, знайсці тэхніку за высокай кукурузнай сцяной атрымалася не адразу. Прыйшлося ў чарговы раз турбаваць старшыню гаспадаркі Аляксея Чарняўскага, удакладняць каардынаты, дзе вядуцца работы на полі каля Навасядаў.
Намеснік старшыні Сяргей Чарняўскі адзначыў, што кукуруза ўрадзіла на славу.
-У гэтым годзе пад кукурузу адвялі 950 га сваіх плошчаў, што больш на 100 га, чым летась, — заўважыў наш суразмоўца. – Амаль уся яна пойдзе на корм жывёле ў выглядзе сіласу, і толькі 100 га – на зерне. Гатунак “Лювена” – раннеспелы гібрыд – на нашых палетках зарэкамендаваў сябе выдатна.
Тут і расказваць нічога не трэба – хопіць паглядзець на сакавітую кукурузную сцябліну! Практычна два метры ў вышыню. Нават магутны дваццацітонны МАЗ Віталя Блажэвіча хаваецца ў гэтых зялёных угоддзях.
Па стане на пятніцу, 30 жніўня, крэйванцаўскія аграрыі ўбралі кукурузу на 114 гектарах. Валавы збор склаў 4365 тон. За дзень у траншэю адвозіцца ў сярэднім 600-700 тон зялёнай масы. Найперш запаўняецца траншэя на жывёлагадоўчым комплексе у Навасядах, да якога рукой падаць. Таму і нядзіўна, што тэхніка, занятая на адвозцы, выстройваецца ў чаргу. Сяргей Цяшкевіч, які працуе на кормаўборачным камбайне, стараецца са ўсіх сіл – спрытна і ўпэўнена вядзе сваю машыну, хутка падстаўляючы рукаво сіласаправода ў кузаў чарговага аўто.
На пытанне, ці не маладосць іграе галоўную ролю ў такім спрыце, Сяргей смяецца і дадае:
-Так, мне толькі 27 гадоў, але ж і вопыт ніхто не адмяняў – дзявяты год працую ў сельскай гаспадарцы. Восем з іх аддаў рабоце ў КСУП “Прыгранічны”, а сёлета перайшоў да суседзяў. Такое рашэнне прыняў сам – і не шкадую. Стымул працаваць ёсць, неабходныя ўмовы створаны, таму і стараюся – надвор’е спрыяе, ураджай добры, настрой таксама.
На адвозцы зялёнай масы задзейнічана пяць адзінак тэхнікі. На працягу трох год дапамогу КСУП “Крэйванцы” аказвае вадзіцель аўтамабільнага парка №13 Станіслаў Мардас. Яго вадзіцельскі стаж складае 45 год. Значны вопыт працы і ў Віталя Блажэвіча, які ў мінулым годзе перавёз на сваім МАЗе больш за тры тысячы тон зерня ад камбайнаў. Сельскагаспадарчай галіне Ашмяншчыны ён адданы на працягу 25 год.
З запалам працуюць аграрыі не толькі на кукурузным полі. Не спыняецца ні на хвіліну трамбоўка зялёнай масы ў траншэі. Два магутныя “Амкадоры”, якімі ўпраўляюць Вадзім Малышка і Уладзімір Павілойць, добра разумеюць, што ад іх у значнай меры залежыць захаванне тэхналогіі нарыхтоўкі сіласу, адпаведна – і якасць кармоў.
Адказнасць за кармавую базу гаспадаркі ляжыць сёння не толькі на кіраўніцтве сельскагаспадарчай арганізацыі. Кожны, хто звязаў сваё жыццё з нялёгкай і не заўсёды ўдзячнай работай на зямлі, на генетычным узроўні адчувае важнасць усіх працэсаў, што тут адбываюцца. Толькі пры такім падыходзе можна разлічваць на рэзультат.
Аліна САНЮК.
Фота аўтара.